वाशिङ्टन- अमेरिकी राष्ट्रपति डोनाल्ड ट्रम्पले चीनका राष्ट्रपति शी जिनपिङले इरानलाई कुनै हतियार नदिइरहेको बताएको उल्लेख गरेका छन् ।

यो जानकारी दुवै नेताहरूबीच भएको पत्राचारपछि बाहिर आएको हो। ट्रम्पले उनीहरूलाई चीनले इरानलाई हतियार दिइरहेको खबर आएको बताउँदै त्यसपछि शीलाई पत्र लेखेर आपत्ति जनाएको उल्लेख गरेका छन् । उनले पत्र नै लेखेर यस्तो नगर्न भनेको बताएका छन्।

ट्रम्पका अनुसार समकक्षी राष्ट्रपतिले जवाफी पत्रमा चीनले यस्तो कुनै आपूर्ति नगरिरहेको बताएका छन् ।

उनले इरानसँग जोडिएका घटनाक्रम वा तेल बजारमा भएको परिवर्तनले उनी र शी जिनपिङबीच अर्को महिनामा हुने बैठकमा कुनै असर नपार्ने पनि बताए ।

अमेरिकी गुप्तचर रिपोर्टहरूमा चीनले इरानलाई एयर डिफेन्स सिस्टम दिन तयारी गरिरहेको उल्लेख भएपछि यो विषय चर्चामा आएको थियो।

इटालीमाथि खनिए

अमेरिकी राष्ट्रपति ट्रम्पले अमेरिका र इटलीको सम्बन्ध पहिले जस्तो नरहेको बताएका छन्। उनले इरान युद्धमा इटलीकी प्रधानमन्त्री जर्जिया मेलोनीको रवैयाप्रति असन्तुष्टि व्यक्त गरेका छन्।

फक्स न्यूजलाई दिएको अन्तर्वार्तामा ट्रम्पले मेलोनीको रवैया नकारात्मक रहेको बताए । ‘जुन देशहरूले इरान मामिलामा अमेरिकाको साथ दिँदैनन्, उनीहरूसँगको सम्बन्ध पहिले जस्तो रहन सक्दैन’, उनले भने ।

ट्रम्पले नाटोको पनि आलोचना गर्दै यदि सहयोगी देशहरूले अमेरिकाको साथ नदिए अमेरिकाले यति ठूलो खर्च किन गरिरहेको छ भन्ने प्रश्न उठ्ने बताए।

उनले इरानभन्दा ठूला मुद्दाहरूमा सहयोग आवश्यक रहेको बताउँदै त्यो नभएमा सम्बन्धमा असर पर्ने पनि बताए ।

यसअघि नै मेलोनीले अमेरिका–इरान युद्धमा सामेल हुन अस्वीकार गरेकी थिइन्। त्यसपछि दुई देशबीच मतभेद देखिएको छ।