काठमाडौं- नेपाली कांग्रेसका निवर्तमान उपसभापति पूर्णबहादुर खड्काले पार्टीको अनुशासन समितिले आफूलाई सोधेको स्पष्टीकरणलाई हाँस्यास्पद भनेर कटाक्ष गरेका छन् ।

बुधबार सानेपामा बसेको कांग्रेस केन्द्रीय अनुशासन समितिको बैठकमार्फत् आफूलाई स्पष्टीकरण सोधिएपछि खड्काले यस्तो बताएका हुन्।

उनले आफूलाई स्पष्टीकरण सोध्ने समितिलाई नै अवैधानिक भनिदिएका छन् । उक्त समितिले हुँदै नभएको जिम्मेवारी देखाएर पार्टीको लेटरप्याड दुरुपयोग गरेको आरोपमा खड्कासँग ७ दिने स्पष्टीकरण सोध्ने निर्णय गरेको थियो ।

उता देउवा समूहबाट अहिले पनि कार्यवाहक सभापतिका नाममा वक्तव्य निकालिरहेका खड्काले आफूले सक्कली लेडरहेड नै प्रयोग गरेको जिकिर गरेका छन् ।

आफूले पुस अन्तिममा भएको विशेष महाधिवेशन र विशेष महाधिवेशनबाट निर्वाचित गगन थापा नेतृत्वको केन्द्रीय कार्यसमितिलाई अवैध रहेको मागदाबीसहित सर्वोच्च अदालतमा रिट हालेको उनले सम्झाए । अहिले पनि उक्त रिटबारे अन्तिम निर्णय आइनसकेको खड्काले बताएका छन्।

‘अवैधानिक विशेष महाधिवेशन र अवैधानिक ढंगले निर्वाचित कार्यसमितिले बनाएका अवैध संरचनाले स्पष्टीकरण सोध्ने जुन निर्णय भएको छ,’ उनल, ‘यो निर्णय निरर्थक र हास्यास्पद छ, अर्थहीन पनि छ । मेरो कुरा अहिलेलाई यत्ति नै हो ।’

खड्काले यसअघि दुई पटकसम्म कांग्रेस कार्यवाहक सभापतिका रुपमा वक्तव्य निकालेका छन् । उनले रमेश लेखक र केपी शर्मा ओलीलाई गरिएको धरपकडको कार्यवाहक सभापतिकै रुपमा विरोध गरेका थिए ।