काठमाडौं – अहिले टिकटकमा भाइरल र दर्शकको मुखमा झुण्डिएको गीत ‘मायालाई के दिऊँ म बैना’ समावेश फिल्म ‘लालीबजार’का निर्देशक हुन्– यम थापा ।

दुई फिल्म निर्देशन र दर्जन फिल्मका पटकथा लेखिसकेका यमले ‘लालीबजार’मा जोडिनु अचम्मको विषय होइन । फिल्म ‘परान’मा दर्शकले अत्याधिक मन पराएका अधिकांश उनैले लेखेका हुन् ।

षट्कोण आर्ट्स् ब्यानरको फिल्ममा निर्देशक बन्नु चाहिँ सामान्यभन्दा फरक विषय हो ।

षट्कोण आर्टस्का फिल्मको निर्देशक प्रदीप भट्टराई हुन् । जसका सबै फिल्म सुपरहिट छन् । यही ब्यानरको ‘जात्रा’ सिरिज दर्शकले खुबै मन पराए ।

यमसँग पनि एउटा कथा थियो । षट्कोण आट्सले फिल्म बनाउन कथा खोजेको थाहा पाएपछि यमले आफ्नो कथा प्रदीप र उनको टिमलाई सेयर गरे ।

यम भन्छन्, ‘उहाँहरू तराईको कथा खोज्दै हुनुहुन्थ्यो । अनि मैले आफूसँग भएको आमा–छोरीको कथा सुनाए ।’

तर, त्यस समय प्रदीपकै निर्देशनमा फिल्म बन्ने सोचका साथ कथा सुनाएको यमले सेयर गरे । हुन पनि पट्कोण आट्र्स एक्लो र सतप्रतिशत सफल फिल्म दिने निर्देशक हुन्– प्रदीप ।

उक्त ब्यानरमा बन्ने फिल्म अरुले निर्देशन गर्न पाउँछ भनेर पनि कसरी सोच्नु ?

तर, पटकथामा छलफल भएपछि षट्कोण आर्टस्ले यमलाई नै निर्देशनको प्रस्ताव राख्यो । उनी थप्छन्, ‘म त पहिला आफ्नो कथा प्रदीप भट्टराई जस्तो राम्रो निर्देशकको हातमा जाने भयो भनेर सोचिरहेको थिएँ । पछि मलाई नै निर्देशन गर्न दिने कुरा भयो । त्यहाँ कसले निर्देशन गर्ने भन्ने कुरामा चर्चा नै भएन ।’

फिल्मको नाम ‘लालीबजार’ भने प्रदीपले नै राखेको यमले बताए । उनी भन्छन्, ‘सुटिङका लागि लोकेशन हेर्ने क्रममा प्रदीप सरले नै नाम ‘लालीबजार’ राख्ने प्रस्ताव गर्नुभयो । जसमा सबैको सहमति भयो ।’

वैशाख १८ बाट प्रदर्शनमा आउने यस फिल्मको शीर्ष नायिका स्वस्तिमा खड्का र रवीन्द्रसिंह बानियाँ हुन् । म्याक्स दिपेश खत्री र रवीन्द्रसिंह बानियाँ निर्माता र प्रदीप कार्यकारीको निर्मातामा छन् ।