काठमाडौँ – साविक विजेता पेरिस सेन्ट जर्मेन (पीएसजी) र एट्लेटिको मड्रिड युरोपेली च्याम्पियन्स लिगको सेमिफाइनलमा प्रवेश गरेका छन् । मङ्गलबार राति भएका क्वाटरफाइनलका दोस्रो लेगमा जित निकाल्दै दुवै टोलीले अन्तिम चारको यात्रा तय गरेका हुन् ।

पीएसजीले लिभरपुललाई उसकै मैदान एनफिल्डमा २–० ले पराजित गर्‍यो । पीएसजीको जितमा दुवै गोल ओसमन डेम्बेलेले गरे । उनले ७२ औँ मिनेट र खेलको इन्जुरी समयमा गोल थपेका थिए । पहिलो लेगमा पनि २–० ले नै विजयी भएको पीएसजी समग्रमा ४–० को नतिजासहित सेमिफाइनल पुगेको हो । लिभरपुल लगातार दोस्रो सिजन पीएसजीसँग पराजित हुँदै बाहिरिएको छ ।

अर्को खेलमा बार्सिलोनाले एट्लेटिको मड्रिडलाई २–१ ले हराए पनि प्रतियोगिताबाट बाहिरिनु पर्‍यो । पहिलो लेगमा २–० को जित निकालेको एट्लेटिको समग्रमा ३–२ को अग्रतासहित सेमिफाइनल पुग्न सफल भयो ।

बार्सिलोनाका लागि लामिन यामल र फेरान टोरेसले गोल गरे पनि एट्लेटिकोका एडेमोला लुकमनले गरेको एक गोल नै निर्णायक बन्यो ।