काठमाडौं – आइतबार साँझ नेपालका विभिन्न स्थानबाट आकाशमा देखिएको उज्यालो दृश्य वास्तवमा नेपालमाथि उडेको रकेट नभएको प्रारम्भिक जानकारी सार्वजनिक भएको छ।

नेपाल अन्तरिक्ष अनुसन्धान केन्द्रकाका अनुसार उक्त दृश्य सम्भवतः चीन बाट प्रक्षेपण गरिएको रकेट अन्तरिक्षतर्फ उड्दा देखिएको धुवाँ सूर्यको प्रकाशले चम्किएर देखिएको घटना हुनसक्ने बताइएको छ।

रकेट पृथ्वीको सतहबाट करिब २०० देखि ४०० किलोमिटर उचाइमा पुगेपछि त्यसबाट निस्कने ग्यास र धुवाँ अत्यधिक फैलिने भएकाले पृथ्वीका टाढा–टाढाका स्थानबाट समेत देखिन सक्छ। यही कारणले नेपालसँगै भूटान र असम लगायत भारतका केही क्षेत्रबाट पनि एकै समयमा उक्त दृश्य देखिएको हुनसक्ने अनुमान गरिएको छ।

विशेषज्ञहरूका अनुसार यस्तो अवस्थामा रकेट नेपालमाथि उडिरहेको हुँदैन, बरु निकै टाढा—सम्भवतः नेपालको उत्तरतर्फ तिब्बत वा चीनको आकाशमाथि रहेको हुन सक्छ। तर अत्यधिक उचाइमा पुगेपछि त्यसबाट निस्किएको उज्यालो धुवाँ नेपालबाट पनि देखिन सक्छ।

वैज्ञानिक भाषामा यस प्रकारको दृश्यलाई “ट्वाइलाइट रकेट प्लुम” भनिन्छ । उपग्रह प्रक्षेपणका क्रममा कहिलेकाहीँ देखिने यस्तो दृश्य सामान्य खगोलीय घटना भएको विज्ञहरूले बताएका छन् ।