काठमाडौँ – राष्ट्रिय स्वतन्त्र पार्टी (रास्वपा) का सभापति रवि लामिछानेमाथि लागेको संगठित अपराध र सम्पत्ति शुद्धीकरण मुद्दाको अभियोगपत्र फिर्ता लिने निर्णयविरुद्धको रिटमा आइतबार सर्वोच्च अदालतमा सुनुवाइ हुँदैछ ।

सर्वोच्च अदालतका न्यायाधीशद्वय सारङ्गा सुवेदी र सुनिलकुमार पोखरेलको संयुक्त इजलासमा आइतबार उक्त रिटको सुनुवाइ हुन लागेको हो ।

महान्यायाधिवक्ता सविता भण्डारीले लामिछानेमाथि विभिन्न जिल्लामा विचाराधीन रहेका सहकारी ठगी, संगठित अपराध र सम्पत्ति शुद्धीकरण मुद्दामध्ये संगठित अपराध र सम्पत्ति शुद्धीकरणको अभियोग हटाउन जिल्ला सरकारी वकिल कार्यालयलाई निर्देशन दिएकी थ्इिन् । गत पुस ३० गते लामिछानेलाई सहकारी ठगीमा मात्र मुद्दा चलाउन भनिएको थियो ।

महान्यायाधिवक्ताको उक्त निर्देशन ‘बदनियतपूर्ण’ रहेको दाबी गर्दै वरिष्ठ अधिवक्ता दिनेश त्रिपाठी, कानुनका विद्यार्थी आयुष बडाल र युवराज पौडेलले सर्वोच्चमा छुट्टाछुट्टै रिट दायर गरेका हुन् ।

सहकारीको बचत रकम अपचलनका सम्बन्धमा लामिछानेमाथि विभिन्न जिल्लामा अनुसन्धान र अदालती प्रक्रिया जारी छ ।

आइतबार सर्वोच्चमा हुने सुनुवाइले महान्यायाधिवक्ताको निर्देशन कायम रहने वा नरहने भन्नेबारे टुंगो लाग्नेछ ।