काठमाडौं- भारतको चिकित्सा उपकरण उद्योग आगामी केही वर्षमा तीव्र गतिले विस्तार हुने प्रक्षेपणसहितको प्रतिवेदन सार्वजनिक भएको छ ।

रूबिक्स डेटा साइन्सेसले हालै सार्वजनिक गरेको प्रतिवेदन अनुसार सन् २०२५ मा १५.२ अर्ब डलर रहेको यो बजार सन् २०३० सम्ममा ५०.१ अर्ब डलर पुग्ने अनुमान गरिएको छ ।

हाल भारत एसियाको चौथो ठूलो बजार हो भने यो विश्वका शीर्ष २० ठूला चिकित्सा उपकरण बजारको सूचीमा पर्छ । उत्पादनमा आधारित सरकारी प्रोत्साहन योजना, मेडिकल डिभाइस पार्कको प्रवर्द्धन र मेडटेक मित्र जस्ता पहलहरूले यो वृद्धिलाई तीव्रता दिएको भारतीय समाचार संस्था एएनआईले जनाएको छ ।

साथै, स्वास्थ्य बिमाको पहुँच विस्तार, बढ्दो आम्दानी र स्वास्थ्य पर्यटनका कारण पनि सस्तो तथा अत्याधुनिक उपकरणहरूको माग बढ्दो छ ।

भारतले सन् २०२५ सम्म ४.१ अर्ब डलर बराबरको चिकित्सा उपकरण निर्यात गरेको छ । सरकारले आगामी वर्षहरुमा विश्व बजारमा भारतको हिस्सा १.६ प्रतिशतबाट बढाएर १२ प्रतिशत पुऱ्याउने लक्ष्य राखेको छ । भारतबाट जर्मनी, अमेरिकाजस्ता मुलुकमा यस्तो सामग्रीको निर्यात हुँदै आएको छ ।

यद्यपि, उच्च प्रविधियुक्त उपकरणहरूका लागि भारत अझै पनि ७० देखि ८० प्रतिशत आयातमा निर्भर छ। भारतले खासगरी अमेरिका र चीनबाट यस्ता सामग्री आयात गर्दै आएको छ ।