काठमाडौं– बलिउड सुपरस्टार रणवीर सिंह अभिनीत जासुसी थ्रिलर फिल्म ‘धुरन्धर’को सफलता र लोकप्रियतापछि यसको सिक्वेल ‘धुरन्धर २’ को तयारीमा छ।

फिल्मफेयरका अनुसार, पहिलो भागमा मारिएका पात्र ‘रहमान डकैत’को भूमिकामा देखिएका अक्षय खन्ना दोस्रो भागमा फर्कन लागेका छन्।

निर्माताहरूले ‘धुरन्धर २’मा रहमान डकैतको पृष्ठभूमि कथा विशेष रूपमा प्रस्तुत गर्ने योजना बनाएका छन्। फिल्मको प्रदर्शन मार्च १९, २०२६ इदका अवसरमा हुने औपचारिक घोषणा गरिसकिएको छ।

‘धुरन्धर’ पहिलो भागले रिलिज भएको तीन सातामै ५०० करोड रुपैयाँभन्दा बढीको विश्वव्यापी व्यापार गर्दै फ्रेन्चाइजका लागि बलियो संकेत दिएको थियो।

यसमा रणवीर सिंहसँगै सञ्जय दत्त, आर. माधवन, अक्षय खन्ना, आदित्य र अर्जुन रामपाल जस्ता कलाकारहरूको अभिनय विशेष उल्लेखनीय रहेको थियो।