काठमाडौं– बलिउड अभिनेता अजय देवगन अभिनीत ‘दृश्यम ३: द कन्क्लुजन’ले प्रदर्शनको १२ दिनमै विश्वव्यापी रूपमा ५०१.८० करोड भारु कमाएको छ ।

यो अजयको करिअरकै सर्वाधिक कमाइ गर्ने फिल्मसमेत बनेको छ । यति ठूलो व्यावसायिक सफलता र दर्शकको चासो हुँदाहुँदै पनि निर्देशक अभिषेक पाठकले चौथो भाग निर्माण गर्ने योजना नरहेको बताएका छन् ।

निर्देशक पाठकका अनुसार ‘दृश्यम’को कथा तेस्रो भागमै पूरा भएको छ । दर्शकले फिल्म मन पराएको वा यसले राम्रो कमाइ गरेको आधारमा मात्रै अर्को भाग बनाउनु उचित नहुने उनको तर्क छ। सिक्वेल निर्माणको निर्णय कथाको आवश्यकतामा निर्भर हुनुपर्ने उनको भनाइ छ ।

तेस्रो भागमा कथालाई सुन्दर ढंगले टुंग्याइएको भन्दै पाठकले व्यावसायिक सफलताका लागि मात्रै कथा लम्ब्याएर यसको प्रभाव कमजोर बनाउन नचाहेको बताएका छन् । धेरैले चौथो भाग बनाउन सुझाव दिए पनि कथालाई कुनै न कुनै बिन्दुमा अन्त्य गर्नुपर्ने उनको धारणा छ ।

अक्टोबर २ देखि प्रदर्शनमा आएको यस क्राइम थ्रिलरमा अजय देवगनसँगै तब्बु, श्रिया सरन र जयदीप अहलावतलगायत कलाकारको अभिनय छ । ‘दृश्यम ३’ नेपालका सिनेमा हलमा समेत प्रदर्शनरत छ ।

फिल्मले बक्स अफिसमा ठूलो सफलता पाए पनि निर्देशकले कथाको पूर्णतालाई प्राथमिकता दिएका छन् । यसले एउटा प्रश्नसमेत उठाएको छ। हरेक सफल फिल्मको सिक्वेल आवश्यक हुन्छ, कि दर्शकको मनमा कथा पूरा भएको अनुभूति छाड्नु नै राम्रो अन्त्य हो ?