एजेन्सी – जर्मनीको बोचमस्थित एक अपार्टमेन्ट भवनमा भएको आगलागीमा परी तीन भारतीय विद्यार्थीको मृत्यु भएको छ । घटनाको अनुसन्धानका क्रममा प्रहरीले भवनमै बस्ने ४१ वर्षीय एक व्यक्तिलाई पक्राउ गरेको छ ।

बर्लिनस्थित भारतीय दूतावासले बुधबार सामाजिक सञ्जाल एक्समार्फत उत्तरी राइन–वेस्टफालिया राज्यको बोचममा भएको आगलागीमा तीन भारतीय नागरिकको मृत्यु भएको पुष्टि गरेको हो । मृतक तीनै जना जर्मनीमा अध्ययनरत थिए ।

प्रहरीका अनुसार मृत्यु हुनेमा २५ र २७ वर्षका दुई महिला तथा २६ वर्षीय एक पुरुष छन् ।

भारतीय दूतावासका अनुसार बर्लिनस्थित दूतावास र फ्रान्कफर्टस्थित भारतीय महावाणिज्य दूतावास स्थानीय अधिकारी तथा मृतकका परिवारसँग सम्पर्कमा छन् । उनीहरूले परिवारलाई आवश्यक सहयोग उपलब्ध गराइरहेका छन् । दूतावासले मृतकका परिवारप्रति समवेदना पनि व्यक्त गरेको छ ।

जर्मन प्रहरी र अभियोजनकर्ताका अनुसार आगलागीको कारण पत्ता लगाउन गरिएको विस्तृत अनुसन्धानका क्रममा प्राविधिक त्रुटिको सम्भावना अस्वीकार गरिएपछि भवनका ४१ वर्षीय एक बासिन्दामाथि शङ्का बढेको हो ।

सन्दिग्ध व्यक्तिसँग हत्या अनुसन्धान गर्ने प्रहरी अधिकारीहरूले सोधपुछ गरेका छन् । बोचम अभियोजन कार्यालयको निर्देशनमा घटनाबारे थप अनुसन्धान भइरहेको छ ।

जर्मनीको सार्वजनिक प्रसारक एनडीआरलाई उद्धृत गर्दै एनाडोलु समाचार एजेन्सीले आगलागी हुनुभन्दा एक दिनअघि भवनमा विवाद भएपछि प्रहरी बोलाइएको जनाएको छ । उक्त भवनमा यसअघि पनि विभिन्न घटनाका कारण प्रहरी पुगेको समाचारमा उल्लेख छ । यद्यपि, प्रहरीले ती पुराना घटनाको आगलागीसँग सम्बन्ध नरहेको जनाएको छ ।

आगलागीको वास्तविक कारण तथा घटनासँग सम्बन्धित अन्य परिस्थितिबारे जर्मन अधिकारीहरूले अनुसन्धान जारी राखेका छन् ।