काठमाडौँ – नेपाली कांग्रेसको १५औँ महाधिवेशनअन्तर्गत केन्द्रीय कार्यसमिति चयनका लागि जारी मतगणनाको सम्पूर्ण परिणाम बिहीबार रातिसम्म सार्वजनिक हुने भएको छ ।

निर्वाचन समितिका सदस्यसचिव राजु कटुवालले बिहीबार रातिसम्म सबै पदको मतपरिणाम सार्वजनिक भइसक्ने जानकारी दिएका छन् । उनका अनुसार सभापति, उपसभापति, महामन्त्री, दलित सहमहामन्त्री, खुला सहमहामन्त्री, महिला सहमहामन्त्री र मुस्लिम सहमहामन्त्रीलगायत पदको नतिजा आइसकेको छ ।

नेपाल जनसम्पर्क समिति तथा विभिन्न पेसागत समूहको मतगणना पनि सम्पन्न भइसकेको कटुवालले बताए । उनले अघिल्लो महाधिवेशनको तुलनामा यसपटक मतगणना प्रक्रिया निकै छिटो भएको उल्लेख गरे ।

महाधिवेशनबाट सभापतिमा गगनकुमार थापा निर्वाचित भइसकेका छन् । वरिष्ठ उपसभापतिमा विश्वप्रकाश शर्मा र महिला उपसभापतिमा पुष्पा भुसाल निर्विरोध निर्वाचित भएका छन् । खुला उपसभापतिमा डा. चन्द्रकान्त भण्डारी र इन्जिनियर मधु आचार्य तथा समावेशी उपसभापतिमा विनोदकुमार चौधरी निर्वाचित भएका छन् ।

त्यस्तै, खुला महामन्त्रीमा प्रदीप पौडेल र उदयशमशेर राणा तथा महिला महामन्त्रीमा डिला संग्रौला निर्वाचित भइसकेका छन् ।

विभिन्न क्लस्टरका केन्द्रीय सदस्यहरूको अन्तिम मतपरिणामसमेत सार्वजनिक भइसकेको छ । केही क्लस्टरका महामन्त्री र केन्द्रीय सदस्य पदको मतगणना भने जारी रहेको निर्वाचन समितिले जनाएको छ ।