काठमाडौं- नेपाली फिल्म ‘छ माया छपक्कै २’ ले दर्शकमाझ हाँसो र मनोरञ्जनसँगै पारिवारिक जीवनका उतारचढावको कथा ल्याउने संकेत गरेको छ। प्रदर्शनको तीन दिनअघि  सार्वजनिक गरिएको फिल्मको ट्रेलरमा श्रीमान्-श्रीमतीको सम्बन्ध, सन्तान प्राप्तिका लागि गरिने संघर्ष र हास्यपूर्ण घटनाक्रमलाई समेटिएको छ ।

करिब सात वर्षअघि प्रदर्शनमा आएको सफल फिल्म ‘छ माया छपक्कै’ को दोस्रो शृंखलामा दीपकराज गिरी र केकी अधिकारी पुनः श्रीमान्–श्रीमतीकै भूमिकामा देखिएका छन् । अघिल्लो भागको कथालाई निरन्तरता दिँदै तयार पारिएको फिल्ममा यसपटक सन्तान प्राप्तिका लागि दम्पतीले गर्ने संघर्षलाई मुख्य विषय बनाइएको छ ।

ट्रेलरमा दीपकराजको पात्र ‘पठाओ’ चालकका रूपमा देखिन्छ । हास्यरसले भरिएका संवाद र पारिवारिक घटनाक्रमले फिल्मलाई मनोरञ्जनात्मक बनाउने संकेत गरेका छन्। त्यस्तै, अभिनेत्री सनिशा भट्टराईको प्रवेशले कथामा नयाँपन र थप रोचकता ल्याउने देखिन्छ ।

दीपेन्द्र लामाको निर्देशनमा बनेको फिल्ममा दीपकराज गिरी, केकी अधिकारी र सनिशा भट्टराईसँगै दीपाश्री निरौला, प्रकाश घिमिरे, कर्मा, रमा थपालिया, रिहान गिरी, मेक्सम गौडेल, निर्मल शर्मा र रविन्द्र झालगायत कलाकारको अभिनय छ ।

आमा सरस्वती मुभिज, रोहित अधिकारी फिल्म्स र आइएमईको संयुक्त प्रस्तुति रहेको फिल्मका मुख्य निर्माता रोहित अधिकारी हुन् । निर्मल शर्मा र सुरज बम ठकुरी कार्यकारी निर्माता छन् ।

पारिवारिक सम्बन्धभित्रका समस्या र सन्तान प्राप्तिको चाहनालाई हास्यरससँग जोडिएको ‘छ माया छपक्कै २’ असोज ३१ गते शनिबारदेखि प्रदर्शनमा आउनेछ । सार्वजनिक ट्रेलरले दर्शकलाई हँसाउँदै पारिवारिक जीवनका संवेदनशील पक्षसमेत देखाउने अपेक्षा जगाएको छ ।