काठमाडौँ- जनता समाजवादी पार्टी (जसपा), नेपालले बाढीपीडितको उद्धार, राहत तथा पुनर्स्थापनाका लागि प्रधानमन्त्री दैवी प्रकोप राहत कोषमा २१ लाख रुपैयाँ आर्थिक सहयोग प्रदान गरेको छ ।

रसुवागढी तथा भोटेकोशी क्षेत्रमा आएको बाढीबाट प्रभावित नागरिकहरूलाई सहयोग पुर्‍याउने उद्देश्यले पार्टीले सो रकम हस्तान्तरण गरेको हो ।

पार्टीको केन्द्रीय कार्यकारिणी समितिको बैठकको निर्णयअनुसार मंगलबार पार्टीका महासचिवद्वय प्रकाश अधिकारी र डा. सुरेन्द्र कुमार झा (विपद् व्यवस्थापन तथा राहत आर्थिक सहयोग संकलन समितिका संयोजक) एवं पार्टी सचिव शैलेन्द्र प्रसाद साह सम्मिलित प्रतिनिधिमण्डलले अर्थमन्त्री डा. स्वर्णिम वाग्लेलाई भेटी उक्त रकमको चेक हस्तान्तरण गरेको छ ।

चेक हस्तान्तरण कार्यक्रममा प्रतिनिधिमण्डलका सदस्यहरू वीरेन्द्र प्रधान, रमेशबाबु श्रेष्ठ, पेशल ढकाल र भुवनेश्वर चौधरीको पनि उपस्थिति थियो ।

विपद्को यस घडीमा प्रभावित नागरिकहरूको साथमा रहनु र सरकारको उद्धार तथा राहत कार्यलाई समर्थन गर्नु सबैको साझा दायित्व भएको जसपाले जनाएको छ ।

यसका साथै, पार्टीले देश-विदेशका नेपाली र दाता निकायहरूलाई पनि यस मानवीय अभियानमा सहभागी हुन पनि भनेको छ।