काठमाडौं– प्रधानमन्त्री बालेन्द्र शाहले अर्थतन्त्र चलायमान बनाउन श्रृंखलाबद्ध छलफल तथा भेटघाट गरेपनि त्यसले सेयर बजारमा सकारात्मक असर दिन सकेको थिएन ।

तर, अर्थमन्त्री डा स्वर्णिम वाग्लेले सोमबार र ‘पुँजी बजार सुदृढीकरण तथा पुनरुत्थान कार्ययोजना, २०८३’ ल्याएपछि भने मंगलबार सेयर बजार हरियाली बन्न पुगेको छ ।

मंगलबार नेपाल स्टक एक्सचेञ्ज (नेप्से) ४८.५७ अंकले बढ्यो । मंगलबार नेप्सेमा ८ अर्ब २९ करोड १७ हजार रुपैयाँको कारोबार हुँदा नेप्से बढेर २६३३.६२ बिन्दुमा पुगेको हो । नेप्से उकालो लागेसँगै मंगलबार नेप्सेको पुँजीकरण पनि १.८७ प्रतिशतले बढेको छ ।

मंगलबार नेप्सेमा कारोबार भएका मध्ये २६५ वटा कम्पनीको सेयर मूल्य बढ्यो भने १२ वटा कम्पनीको सेयर मूल्य घट्यो । एउटा कम्पनीको सेयर मूल्य भने मंगलबार स्थिर रह्यो । नेप्से बढेसँगै मंगलबार सबै समूहको उपसूचक सकारात्मक बन्न पुगेको छ ।

सोमबार अर्थ मन्त्रालयले ‘पुँजी बजार सुदृढीकरण तथा पुनरुत्थान कार्ययोजना, २०८३’ मार्फत पुँजी बजारलाई सकारात्मक गति दिन धेरै नीति अघि सारेको छ । सोही नीतिका कारण मंगलबारको सेयर बजारमा कारोबार रकम बढ्नुका साथै नेप्से उकालो लागेको अनुमान गरिएको छ ।