काठमाडौँ – इङ्लिस प्रिमियर लिगमा लिड्स युनाइटेडले न्युकासल युनाइटेडमाथि ४–१ को फराकिलो जित दर्ता गरेको छ। एल्यान्ड रोडमा सोमबार राति सम्पन्न खेलमा लिड्सलाई जिताउन स्ट्राइकर डोमिनिक काल्भर्ट-लेविनले १ गोल गर्नुका साथै १ असिस्ट प्रदान गरे।

खेल अवधिभर न्युकासलको डिफेन्सलाई दबाबमा राखेका २९ वर्षीय काल्भर्ट-लेविनले दुई गोलको अवसर सिर्जना गरेका थिए। योसँगै उनले न्युकासलविरुद्ध आफ्नो व्यक्तिगत गोलसङ्ख्या ८ पुर्‍याएका छन्। खेलको अन्तिम समयमा उनी मैदानबाट बाहिरिँदा समर्थकले उभिएर स्वागत गरेका थिए।

फ्री-ट्रान्सफरमा लिड्स भित्रिएका काल्भर्ट-लेविनको प्रदर्शनपछि उनलाई इङ्ल्यान्डको राष्ट्रिय टोलीमा पुनरागमन गराइने चर्चा सुरु भएको छ।

खेलपछि आयोजित पत्रकार सम्मेलनमा लिड्सका मुख्य प्रशिक्षक ड्यानियल फार्केले काल्भर्ट-लेविनको प्रशंसा गर्दै उनी जुनसुकै डिफेन्डरका लागि पनि चुनौतीपूर्ण खेलाडी भएको बताए। “उनी हाल उत्कृष्ट फिटनेस र उच्च आत्मविश्वासका साथ खेलिरहेका छन्। यदि यस्तै प्रदर्शन कायम रहे उनी प्रिमियर लिगकै उत्कृष्ट स्ट्राइकर साबित हुनेछन्,” फार्केले भने।