काठमाडौँ– सरकारको नीति तथा कार्यक्रममाथि सांसदले उठाएका प्रश्नको जवाफ अर्थमन्त्री स्वर्णिम वाग्लेले दिने भएका छन् । नीति तथा कार्यक्रममाथिको छलफल र जवाफका लागि विपक्षी दलले प्रधानमन्त्री वालेन्द्र शाह उपस्थित हुनुपर्ने अडान राख्दै बुधबार संसद अवरोध गरेका थिए । प्रतिनिधिसभाको बुधबारको बैठकमा प्रधानमन्त्री अनुपस्थित भएपछि विपक्षीले लगातार अवरोध गरेका थिए ।

प्रतिनिधिसभाको बिहीबारको कार्यसूचीमा नीति तथा कार्यक्रममाथिको छलफलमा उठेका प्रश्नको जवाफ अर्थमन्त्रीले दिने विषय उल्लेख छ । दैनिक कार्यसूचीको दोस्रो नम्बरमा यो विषय राखिएको हो ।

कार्यसूचीमा भनिएको छ, ‘सम्माननीय प्रधानमन्त्रीको तर्फबाट माननीय अर्थमन्त्री डा. स्वर्णिम वाग्लेले सम्माननीय राष्ट्रपतिले २०८३ वैशाख २८ गते सोमबार संघीय संसद्को दुवै सदनको संयुक्त बैठकमा गर्नुभएको सम्बोधनमा उल्लिखित आ.व. २०८३/०८४ को नेपाल सरकारको वार्षिक नीति तथा कार्यक्रममाथिको छलफलका क्रममा उठेका प्रश्नहरूको जवाफ दिनुहुनेछ ।’

प्रधानमन्त्री आफैँले नीति तथा कार्यक्रममाथिको प्रस्ताव सदनमा टेबुल गर्नुपर्ने विपक्षीको माग छ । सभामुखको पहलमा भएको छलफलपछि विपक्षी दलहरू मन्त्रीलाई प्रस्ताव टेबुल गर्न दिन तयार भए पनि छलफल र जवाफका लागि प्रधानमन्त्री नै उपस्थित हुनुपर्ने अडानमा छन् ।

बुधबार विपक्षी सांसदले प्रधानमन्त्रीलाई उपस्थित हुन रुलिङ गर्न पटक–पटक सभामुखसँग आग्रह गरेका थिए । प्रधानमन्त्रीको कार्यतालिकाबारे आफूलाई पूर्वजानकारी नहुने भन्दै रुलिङ गर्न अस्वीकार गरेपछि बैठक चल्न नसकेको हो । विपक्षीको अवरोधपछि बुधबार बैठक पटकपटक स्थगित भए पनि चल्न सकेन ।