काठमाडौं – कुमार कट्टेल ‘जिग्री’ले फिल्मको कथाको क्रेडिट नदिँदा बिच्किएका दीपककुमार आचार्य फेरि उनैसँग सहकार्य गर्ने तयारीमा देखिएका छन् ।

दीपकले नयाँ वर्षको अवसर पारी घोषणा गरेको फिल्म ‘चिरञ्जीवी भवः’मा उनीहरूको सहकार्य हुने भएको हो ।

दीपकले एक विशेष कथामा फिल्म बनाउने लागेको बताए । ‘रोजगारीका लागि जन्म थलो छाड्ने सन्तान र अभिभावको मनोदशा’को कथामा ‘परान’ बनाएका दीपकले त्यस्तै अर्को महत्त्वपूर्ण विषयमा फिल्म बनाउने दाबी गरेका छन् ।

यो फिल्मले दीपक र कुमारको पुरानो दुस्मनी पनि सकिएको सन्देश दिएको छ ।

सिरियल ‘भद्रगोल’देखिका सहकर्मी दीपक र कुमारको सम्बन्ध पछिल्लो समय राम्रो थिएन । कुमार फिल्म ‘लाज शरणम्’ निर्देशनमा लागे । दीपक त्यहीबाट बिच्किए । कथामा आफ्नो नाम नराखेका कारण कुमारसँग दीपक रिसाएका थिए ।

त्यहीकारण उनले जिग्री र अर्जुन घिरिमेको निर्देशनमा बन्दै आएको सिरियल ‘सक्किगोनि’ पनि छाडे । फिल्म निर्देशनमा आफैँ होमिए ।

कुमारको ‘लाज शरणम्’ ‘फ्लप’ भयो । दीपकको ‘परान’ सुपर हिट भयो । गत वर्षको सबैभन्दा बढी व्यापार गर्ने फिल्म नै ‘परान’ हो ।

सतहीरुपमा हेर्दा ‘परान’को सफलताले दीपकसँग कुमार नजिकिएको देखिन्छ । त्यसयता उनीहरूको भेटघाट बाक्लियो । ‘परान’ हलमा नलाग्दासम्म देखिएको यी दुईको इगोको कडा दुस्मनी त्यसपछि भने मित्रतामै फर्कियो ।

अहिले फेरि यी दुई ठूलो पर्दामा नै सहकार्यको मुडमा छन् । कुमारको कथा, सविन अधिकारी र वसन्त न्यौपाने स्क्रिप्ट, दीपकको निर्देशनमा फिल्म बन्ने भएको हो ।

नयाँ वर्षमा यी दुईले दुस्मनी बिर्सिएर नयाँ कामको प्रण गरेका छन् ।

फिल्म क्षेत्रमा सबै अस्थायी हुन्छ, चाहे दोस्ती र दुस्मनी नै किन नहोस् ! जिग्री र काकुले फेरि यो उक्ति सम्झाए ।