पर्सा – सशस्त्र प्रहरी बल, नेपाल नं १३ गण हेडक्वाटर पर्साले रु १४ लाख २५ हजार ५०० बराबरको अवैध सामानहरु बरामद गरेको छ ।

वीरगञ्ज महानगरपालिका–२५, खल्वास्थित सशस्त्र प्रहरी बल नेपाल नेपाल बिओपी ड्राइपोर्ट, पर्साबाट खटिएको टोलीले खल्वा सीमा क्षेत्रको धान खेतमा लुकाई–छिपाई राखेको अवस्थामा सामान बरामद गरेको हो ।

ती सामानको मूल्य रु १३ लाख ४५ हजार ५०० बराबर रहेको सशस्त्र प्रहरी नायब उपरीवेक्षक सुरज क्षेत्रीले जानकारी दिनुभयो । बरामद गरिएका औषधि तथा औषधिजन्य सामग्री वीरगञ्ज भन्सार कार्यालयमा बुझाएको छ ।

त्यसैगरी, पर्सा जिल्लाकै छिपहरमाई गाउँपालिका –५ भिष्वास्थित सीमा इलाकामा सशस्त्र प्रहरीले भन्सार छली नेपालतर्फ ल्याउँदै गरेको ८० हजार बराबरको जुत्ता र चप्पल, प्लास्टिकको खेलौना बरामद गरेको छ । ती सामान भन्सार कार्यालयमा बुझाइने प्रहरीले जनाएको छ ।