बेरुत- इजरायली सेनाले दक्षिणी लेबनानका विभिन्न सहर तथा क्षेत्रमा बुधबार पनि आक्रमण जारी राखेको छ। लेबनानको राष्ट्रिय समाचार एजेन्सीका अनुसार इजरायली सेनाले तोपखाना र मेसिनगनबाट गोलाबारी गर्नुका साथै विभिन्न स्थानमा विस्फोट गराएको छ।

समाचार एजेन्सीका अनुसार इजरायली सेनाले दक्षिणी लेबनानको पश्चिमी क्षेत्रमा पर्ने अल–मन्सुरी र मजदल जोन सहरलाई निशाना बनाएको छ। बुउत अल–सैय्यदत क्षेत्रमा पनि मेसिनगनबाट गोली प्रहार गर्दै सैन्य कारबाही गरिएको छ।

त्यसैगरी, हददा र बाराचित सहरका बाहिरी क्षेत्रमा तोपखानाबाट आक्रमण गरिएको छ। बिन्ट जेबिल जिल्लाअन्तर्गत हरिस र हददा सहरबीचको अल–अरयेश क्षेत्रमा पनि आक्रमण भएको जनाइएको छ। सकरा र वादी अल–सलौकी आसपासका क्षेत्रमा समेत गोलाबारी गरिएको समाचारमा उल्लेख छ।

लेबनान र इजरायलले गत जुनमा अमेरिकाको मध्यस्थतामा सुरक्षा व्यवस्थासम्बन्धी रूपरेखा सम्झौतामा हस्ताक्षर गरेका थिए। सम्झौतामा लेबनानी सेनाको चरणबद्ध तैनाथी, इजरायली सेनाको फिर्ती तथा पुनर्निर्माण र आर्थिक सुधारका उपाय समेटिएका छन्।

यद्यपि, सम्झौतामा उल्लेख गरिएका प्रावधान कार्यान्वयनमा विभिन्न अवरोध कायमै रहेका छन्।