काठमाडौं – परराष्ट्रमन्त्री शिशिर खनाल र नेपालका लागि गणतन्त्र कोरियाका नवनियुक्त राजदूत पार्क जेख्यङबीच शिष्टाचार भेटवार्ता भएको छ।

भेटका क्रममा परराष्ट्रमन्त्री खनालले राजदूत पार्कलाई नेपालका लागि नियुक्त भएकोमा बधाई दिँदै सफल कार्यकालको शुभकामना व्यक्त गरे।

उनले नेपाल सरकार दुवै देश र जनताको पारस्परिक हितका लागि सहकार्य गर्न इच्छुक रहेको बताउँदै राजदूतका रूपमा आफ्नो जिम्मेवारी निर्वाह गर्न परराष्ट्र मन्त्रालयका तर्फबाट पूर्ण सहयोग रहने आश्वासन दिए।

भेटमा नेपाल–दक्षिण कोरिया द्विपक्षीय सम्बन्धका विविध पक्षमा छलफल भएको थियो। दुवै पक्षले आगामी दिनमा दुई देशबीचको विद्यमान मैत्रीपूर्ण सम्बन्धलाई थप सुदृढ र विस्तार गर्दै लैजाने प्रतिबद्धता व्यक्त गरे।