काठमाडौं – नेपाली कांग्रेसका नेता मोहन बस्नेतले पार्टीमाथि धावा बोल्ने विपक्षी दलका नेता तथा कार्यकर्तालाई ठेगान लगाउने चेतावनी दिएका छन्।

सिन्धुपाल्चोकमा कांग्रेसको इतर समूहले आयोजना गरेको कार्यक्रमलाई सम्बोधन गर्दै बस्नेतले आफू पदमा भए पनि नभए पनि पार्टीको पक्षमा उभिने बताएका हुन्।

‘म पदमा हुँ वा नहुँ, धेरथोर रोजगारी सिर्जना गर्दै आएको मान्छे मै हुँ। पदमा हुँ वा नहुँ, विपक्षी पार्टीका नेता–कार्यकर्ताले नेपाली कांग्रेसमाथि धावा बोल्यो भने ठाउँको ठाउँ ठेगान लगाउने मान्छे पनि मै हुँ,’ उनले भने।

बस्नेतले आफू पदमा नरहे पनि जिल्लाको विकासका लागि काम गरिरहने बताए।

‘म पदमा हुँ वा नहुँ, यो जिल्लामा विकास ओसार्ने काममा लाग्ने मान्छे मै हुँ,’ उनले भने।

कांग्रेसभित्र समूहगत गतिविधि चलिरहेका बेला बस्नेतले पार्टीको पक्षमा कडा अभिव्यक्ति दिएका हुन्।