एजेन्सी – चितवनमा १३६ किलो ५०० ग्राम गाँजासहित ट्रक र चालकलाई प्रहरीले नियन्त्रणमा लिएको छ । चितवनको भरतपुर महानगरपालिका–२९, जुगेडीबाट गाँजासहित ट्रक र चालकलाई नियन्त्रणमा लिइएको हो ।

काठमाडौँबाट पथलैयातर्फ जाँदै गरेको ना.५ ख ८६७६ नम्बरको ट्रकमा गाँजा रहेको गोप्य सूचनाका आधारमा जिल्ला प्रहरी कार्यालय चितवनबाट खटिएको प्रहरी टोलीले ट्रक रोकेर जाँच गरेको थियो ।

जाँचका क्रममा ट्रकको पछाडिको ढालामा त्रिपालले छोपेर राखिएका १० वटा पोकामा १३६ किलो ५०० ग्राम गाँजा फेला परेको प्रहरीले जनाएको छ ।

गाँजासहित ट्रक र चालक मकवानपुरको भीमफेदी गाउँपालिका–४, पान्द्राङका २७ वर्षीय रञ्जित सुनारलाई नियन्त्रणमा लिइएको छ । घटनाबारे थप अनुसन्धान भइरहेको प्रहरीले जनाएको छ ।