काठमाडौँ – भाद्र शुक्ल तृतीयाका दिन मनाइने हरितालिका (तीज) पर्व सोमबार देवादिदेव महादेवको पूजा-आराधना गरी मनाइँदैछ। भाद्र शुक्ल तृतीयाका दिन व्रत बसी शिव-पार्वतीको पूजा र उपासना गरेमा पारिवारिक सुख, शान्ति र कल्याण प्राप्ति हुने धार्मिक विश्वास छ। सोमबार पशुपतिनाथ परिसरमा व्रत बसेर पूजापाठका लागि पुगेका महिला र दिदीबहिनी सेल्फी खिच्न व्यास्त देखिएका छन् ।

धर्मशास्त्रीय रूपमा महिला र पुरुष दुवैले हरितालिका (तीज) को व्रत बस्नुपर्ने विधान भए पनि सामाजिक रूपमा भने महिलाहरूले श्रीमान्‌को दीर्घायुको कामनाका लागि गर्ने पर्वका रूपमा लिइँदै आएको छ।

धर्मशास्त्रविद् एवं नेपाल पञ्चाङ्ग निर्णायक विकास समितिका पूर्वअध्यक्ष प्रा.डा. रामचन्द्र गौतमका अनुसार यो व्रत बस्ने पुरुषले विधुर हुनु नपर्ने, नारीले अटल सौभाग्य पाउने र अविवाहित पुरुष तथा महिलाले गुणसम्पन्न वर वा वधु प्राप्त गर्ने शास्त्रीय वचन छ। सत्ययुगमा हिमालयपुत्री पार्वतीले गौरीघाटमा बसेर तपस्या गरी महादेवलाई पतिको रूपमा पाउने वरदान पाएको विश्वासका आधारमा तीज व्रतको परम्परा सुरु भएको पौराणिक मान्यता छ।