काठमाडौं- नेपाली कांग्रेसका नेता तथा पूर्वगृहमन्त्री रमेश लेखकले विशेष महाधिवेशनका नाममा नेपाली कांग्रेस विभाजनको गम्भीर मोडमा पुगेको दाबी गरेका छन् । शेरबहादुर देउवा पक्षद्वारा आयोजित भेलालाई सम्बोधन गर्दै नेता लेखकले पार्टीको वर्तमान परिस्थितिप्रति चिन्ता व्यक्त गर्दै सबै पक्षलाई संयमित र एकताबद्ध हुन आह्वान गरेका छन् ।

भेलामा बोल्दै लेखकले कसैमाथि आरोप–प्रत्यारोप लगाउने पक्षमा आफू नरहेको स्पष्ट पारे । पूर्वसभापति देउवाले यसअघि नै पुनः सभापति नबन्ने घोषणा गरिसकेको स्मरण गराउँदै उनले अहिले पनि पार्टीलाई जोगाउने र एकताबद्ध बनाएर लैजाने क्षमता देउवासँगै रहेको उल्लेख गरे । देउवाले सबैलाई समेटेर अगाडि बढाउनेमा आफू पूर्ण रूपमा विश्वस्त रहेको समेत उनले बताए ।

नेता लेखकले विशेष महाधिवेशनका नाममा सिर्जित मतभेदले पार्टीलाई विखण्डनतर्फ लैजाने जोखिम बढाएको भन्दै आपत्ति जनाए । पार्टीलाई फुटबाट बचाउन शेरबहादुर देउवाकै नेतृत्व र अभिभावकत्वमा एकता कायम गर्दै विधिवत् रूपमा १५औँ महाधिवेशनतर्फ जानुपर्नेमा उनले जोड दिए । कांग्रेसजस्तो ऐतिहासिक पार्टीभित्र आन्तरिक मतभेदहरू हुन सक्ने भए पनि त्यसलाई संवाद र सहमतिका माध्यमबाट समाधान गरी १५औँ महाधिवेशनमार्फत अघि बढ्नु नै अहिलेको मुख्य आवश्यकता रहेको उनको भनाइ थियो ।