काठमाडौँ – नेपाली राष्ट्रिय क्रिकेट टोलीले आज जर्सीसँग प्रतिस्पर्धा गर्दैछ । दुईवटा एकदिवसीय खेल खेल्न लागेको नेपालले पहिलो प्रतिस्पर्धा आज गर्न लागेको हो । नेपाल क्रिकेट संघ क्यानका अनुसार यो खेल नेपाली समय अनुसार दिउँसो ४ः४५ बजे सुरु हुँदैछ ।

जर्सीसँग नेपालले दोस्रो अर्थात् अन्तिम प्रतिस्पर्धा असार ३१ गते गर्दैछ । यसअघि खेलअघि नेपाली टोलीले जर्सीको एनसिसी ग्रानभिलमा विशेष तयारी क्याम्पसमेत सञ्चालन गरेको थियो ।

नेपाली क्रिकेट टोली १८ वर्षपछि जर्सी पुगेको हो । यसअघि सन् २००८ मा नेपालले ब्रिटिश टापु जर्सीमा विश्व क्रिकेट लिग डिभिजन–५ खेलेको थियो, जहाँ सेमिफाइनलमा अफगानिस्तानसँग पराजित भएपछि नेपालको यात्रा टुङ्गिएको थियो । सोही प्रतियोगिताको समूह चरणमा मोजाम्बिकविरुद्ध नेपालका बलर महबुब आलमले एक्लै १० विकेट लिएर विश्व कीर्तिमान बनाएका थिए । आइसिसीको आधिकारिक प्रतियोगितामा कुनै पनि खेलाडीले १० विकेट लिएको त्यो पहिलो ऐतिहासिक अवसर थियो।

जर्सीको तयारीपछि नेपाली टोली लिग–२ खेल्न नेदरल्यान्ड्स प्रस्थान गर्नेछ । नेदरल्यान्ड्समा नेपाल, घरेलु टोली र नामिबियाबीच त्रिकोणात्मक शृंखला हुनेछ।

लिग–२ मा नेपालले जुलाई २१ मा नामिबियाविरुद्ध खेल्दै शृंखलाको सुरुवात गर्नेछ । त्यसपछि जुलाई २३ मा नेदरल्यान्ड्स, जुलाई २७ मा पुनः नामिबिया र जुलाई २९ मा नेदरल्यान्ड्ससँग प्रतिस्पर्धा गर्ने तालिका छ ।