काठमाडौं- भारत र पेरुबीच प्रस्ताव गरिएको स्वतन्त्र व्यापार सम्झौताका लागि अर्को चरणको वार्ता हुने भएको छ । एक वरिष्ठ पेरुभियन कूटनीतिज्ञका अनुसार यो सम्झौता यसै वर्षको अन्त्यसम्ममा सम्पन्न हुन सक्छ ।

भारतका लागि पेरुका राजदूत जाभियर पाउलिनिचले जुन महिनामा वार्ता पुन: सुरु हुने जानकारी दिएका छन् । पेरु विश्वकै तेस्रो ठूलो तामा उत्पादक देश हो । भारत तामा खपतका लागि आयातमा निर्भर छ ।

भारतको हिन्डाल्को इन्डस्ट्रिजले पनि पेरुबाट तामा खरिद गर्ने योजना बनाएको छ । यद्यपि यस विषयमा भारतको वाणिज्य मन्त्रालय र हिन्डाल्को इन्डस्ट्रिजले तत्काल कुनै प्रतिक्रिया दिएका छैनन्।

पेरुले सन् २०२४ मा करिब २७ लाख मेट्रिक टन तामा उत्पादन गरेको थियो । सो वर्ष यस क्षेत्रमा ४.९६ अर्ब डलर वैदेशिक लगानी भित्रिएको थियो । भविष्यमा तामाको माग बढ्ने र आपूर्तिमा कमी आउने सम्भावना छ । त्यसैले भारतले आफ्ना खनिज कम्पनीहरूलाई विदेशमा लगानी गर्न आग्रह गरेको छ । यसले तामाको आपूर्ति प्रणालीलाई सुरक्षित बनाउन मद्दत गर्नेछ ।

भारत प्रशोधित तामा आयात गर्ने विश्वको दोस्रो ठूलो देश हो । सरकारी अनुमान अनुसार सन् २०४७ सम्ममा भारतले आफ्नो आवश्यकताको ९१ देखि ९७ प्रतिशत तामा विदेशबाटै आयात गर्नुपर्ने हुन सक्छ ।

गत आर्थिक वर्षमा भारतको तामा आयात ४ प्रतिशतले बढेर १२ लाख मेट्रिक टन पुगेको छ । सन् २०३० सम्ममा यो माग ३० देखि ३३ लाख टन पुग्ने अनुमान छ ।