तेहरान- इरानले फारस खाडी र ओमान सागरका बन्दरगाहबारे कडा चेतावनी दिएको छ। इरानी सेनाले ती बन्दरगाह ‘या त सबैका लागि खुला हुने, नत्र कसैका लागि पनि नहुने’ स्पष्ट पारेको छ।

सेनाले आफ्नो बन्दरगाहको सुरक्षामा खतरा पुगे खाडी क्षेत्रका कुनै पनि बन्दरगाह सुरक्षित नहुने चेतावनी दिएको छ।

यसका साथै, होर्मुज स्ट्रेटको सुरक्षा सुनिश्चित गरिरहने र ‘शत्रुसँग सम्बन्धित’ जहाजलाई त्यहाँबाट गुड्न नदिने बताएको छ।

अन्य जहाजलाई भने इरानका नियमअनुसार आवतजावत गर्न अनुमति दिइने उल्लेख गरिएको छ।

इरानले युद्ध समाप्त भएपछि समेत होर्मुज स्ट्रेटमा स्थायी नियन्त्रण संयन्त्र लागू गर्ने जनाएको छ।

यसका साथै संयुक्त राज्य अमेरिका माथि अन्तर्राष्ट्रिय जलमार्गमा जहाजको आवतजावत रोक्नु गैरकानुनी भएको आरोप लगाउँदै त्यसलाई ‘समुद्री डकैती’ को संज्ञा दिएको छ।

बेलायतले अमेरिकालाई नसघाउने

बेलायतले इरानका बन्दरगाहमाथि संयुक्त राज्य अमेरिकाले गर्न लागेको नाकाबन्दीमा सहभागी हुन अस्वीकार गरेको छ।

रिपोर्टअनुसार बेलायती नौसेना र सैनिक यो अभियानमा सहभागी हुने छैनन्। तर बेलायतले आफ्ना माइन्स्विपर जहाज र एन्टी–ड्रोन प्रणाली भने क्षेत्रमा सक्रिय रहने जनाएको छ।

यूके सरकारका प्रवक्ताले समुद्री मार्गको स्वतन्त्रताको समर्थन गर्दै होर्मुज स्ट्रेट खुला रहनु अत्यन्त आवश्यक रहेको बताएका छन्।

उनका अनुसार यो महत्वपूर्ण जलमार्ग खुला रहनुले विश्व अर्थतन्त्र र आन्तरिक महँगी नियन्त्रणमा सहयोग पुग्छ।