मुस्काट- ओमानमा ड्रोनको भग्नावशेषले लागेर दुई जनाको ज्यान गएको छ । ओमानको सोहार प्रान्तमा सुरक्षा बलले दुई वटा ड्रोन खसालेका थिए । ती ड्रोनको भग्नावशेषले लागेर दुई जनाको मृत्यु भएको अल जजीराले जनाएको छ ।

ओमानको आधिकारिक समाचार एजेन्सीका अनुसार सोहारको अल-अवाही औद्योगिक क्षेत्रमा एउटा ड्रोन खसेको थियो । यसरी ड्रोन खस्दा त्यहाँ कार्यरत दुई आप्रवासी कामदारले ज्यान गुमाएका छन् ।

सुरक्षा स्रोतलाई उद्धृत गर्दै सार्वजनिक गरिएको सो प्रतिवेदनमा उक्त घटनामा अन्य केही व्यक्तिहरू घाइते समेत भएको उल्लेख छ ।

सोही प्रान्तमा अर्को एउटा ड्रोनलाई पनि सफलतापूर्वक खसालिएको समाचार एजेन्सीले जनाएको छ । हाल सुरक्षा निकायहरूले यस घटनाबारे थप अनुसन्धान गरिरहेका छन् ।

पछिल्लो समय सर्वोच्च नेता आयातोल्लाह अली खामेनीको ज्यान जानेगरी इजरायल र अमेरिकाले इरानमाथि हमला गरेपछि पश्चिम एशियामा द्वन्द्व चर्किएको छ । द्वन्द्वका कारण ओमान, यूएई, कतार बहराइन साउदी अरब कुवेतजस्ता देश चपेटामा परेका छन् ।