काठमाडौं – नायक पल शाह स्टारर फिल्म ‘आबाट आमा’ले सुरुवाती दुई सातामा ८ करोड ७२ लाखभन्दा बढी ग्रस कलेक्सन गरेको निर्देशक चन्द्र पन्तले दाबी गरेका छन् ।

माघ १६ देखि २९ दिनसम्म फिल्मले उक्त ग्रस कलेक्सन गरेको पन्तको दाबी हो । उनले भने, ‘दर्शकको माया अत्यधिक पाइरहेका छौँ। देशभरका अधिकांश हलमा दर्शकको साथ छ। व्यापारअझै बढ्दैछ। भोली शनिबार अझै दर्शक बढ्ने देखिन्छ।’

पन्तका अनुसार घरेलु बजारमा यो फिल्मले ६ करोड ६ लाख ग्रस कलेक्सन गरेको छ । विदेशी बजारमा १ करोड ६६ लाख ग्रस कलेक्सन कटाएको छ ।

फिल्म शुक्रबारबाट प्रदर्शनको तेस्रो सातामा प्रवेश गरेको छ ।

कात्तिक यता लगातर नेपाली फिल्महरुको व्यापार कमजोर रहेको अवस्थामा ‘आबाट आमा’ बक्सअफिसमा बलियो देखिएको छ ।

पछिल्लो समय प्रदर्शनमा आएको हिट फिल्म ‘परान’ हो । त्यसता कुनै पनि फिल्म हिट बन्न सकेका थिएनन् ।

लगातार फिल्महरु फ्लप भएपछि बक्स अफिस चिसिएको चर्चा चलिरहेको छ । यो अवस्थामा ‘आबाट आमा’ भने केही हदसम्म दर्शकलाई हलसम्म तान्न सफल भएको छ ।

आर्या इन्टरटेन्मेन्टको व्यानरमा बनेको यो फिल्मको कथा र पटकथा निर्देशक पन्तकै हो ।

फिल्ममा पलसहित विपना थापा, प्रदीप रावत, साइग्रेस पोखरेल, उषा उप्रेती र सिम्रन पन्त शीर्ष भूमिकामा छन् ।