काठमाडौं- नेपालसँग सीमा जोडिएको भारतको उत्तराखण्ड राज्यले जनस्वास्थ्यलाई मध्यनजर गर्दै सुर्ती तथा निकोटिनयुक्त गुटखा, पान मसला र अन्य खाद्य पदार्थहरूको उत्पादन, भण्डारण, वितरण र बिक्रीमा एक वर्षका लागि पूर्ण प्रतिबन्ध लगाएको छ ।

खाद्य सुरक्षा एवं औषधि प्रशासनका आयुक्त विनय शंकर पाण्डेयद्वारा जारी आदेशअनुसार यो प्रतिबन्ध आज मंगलबारदेखि लागू भएको छ । खाद्य सुरक्षा एवं मानक अधिनियम २००६ र खाद्य सुरक्षा एवं मानक विनियम २०११ का प्रावधान अनुसार यो कदम चालिएको भारतीय सञ्चार माध्यमले जनाएका छन् ।

खाद्य उत्पादनहरूमा सुर्ती र निकोटिनको प्रयोग निषेध भए पनि बजारमा पाइने गुटखा तथा पान मसलाजस्ता वस्तुहरूमा यस्ता घातक पदार्थहरूको मिसावट भइरहेको गुनासो आएपछि प्रशासनले यो निर्णय लिएको हो । यससँगै अब उत्तराखण्ड राज्यभर आगामी एक वर्षसम्म यी वस्तुहरूको निर्माण, गोदाममा भण्डारण, ओसपसार र खुला बजारमा बिक्रीवितरण गर्न पूर्ण रूपमा रोक लगाइएको छ।