काठमाडौँ – नेपाली कांग्रेसका नवनिर्वाचित उपसभापति विनोद चौधरीले पार्टीको गौरवशाली राजनीतिक इतिहासलाई अब आर्थिक समुन्नतिको नेतृत्वमा रूपान्तरण गर्नुपर्ने बताएका छन् ।

उपसभापतिमा निर्वाचित भएपछि महाधिवेशन प्रतिनिधि तथा शुभेच्छुकहरूप्रति आभार व्यक्त गर्दै उनले यस्तो प्रतिबद्धता जनाएका हुन् ।

चौधरीले युवाका सपना, नागरिकका अपेक्षा र राष्ट्रको आवश्यकतालाई केन्द्रमा राखेर समयको मागअनुरूपको सशक्त, गतिशील र जनउत्तरदायी कांग्रेस निर्माण गर्नु आजको साझा दायित्व भएको उल्लेख गरेका छन् ।

समुन्नत नेपाल निर्माणको राष्ट्रिय अभियानलाई सार्थक बनाउन सबैलाई एकताबद्ध भएर अघि बढ्न आह्वान गर्दै उनले भनेका छन्, “आर्थिक रूपान्तरण, युवाका आकांक्षाको सम्बोधन र नागरिकको जीवनमा सकारात्मक परिवर्तन ल्याउने संकल्पका साथ म आफ्नो जिम्मेवारी निर्वाह गर्नेछु ।”