काठमाडौँ – जर्मनीका लागि प्रस्तावित नेपाली राजदूत सरु जोशीले मंगलबार संसदीय सुनुवाइ समितिमा आफ्नो कार्ययोजना प्रस्तुत गरेकी छन् ।

महत्त्वपूर्ण कार्ययोजना र लामो तयारीका साथ संसदीय सुनुवाइ समितिमा प्रस्तुत भएकी जोशीले पटक-पटक आफू प्रस्तावित देशको नाम शुद्ध उच्चारण गर्न सकिनन् ।

उनी जर्मनीका लागि प्रस्तावित राजदूत हुन् । तर उनले लगातार आफू प्रस्तावित देशको नाम ‘जर्मन’ उच्चारण गरिन् ।

विद्यालय शिक्षादेखि नै पढ्नुपर्छ ‘जर्मनी’ देश हो ‘जर्मन’ त्यहाँका नागरिक हुन् । तर, प्रस्तावित राजदूतले देशको नाम नै लगातार ‘जर्मन’ भनिन् ।

जोशीले संसदीय सुनुवाइ समितिमा कार्ययोजनाको सुरुवात गर्दा भनिन्, ‘जर्मन भौगोलिक रुपमा यसरी यस्तो ठाउँमा अवस्थित छ कि यसका वरिपरि मार्केट छ । अन्य देश हुनुहुन्छ । यो दृष्टिकोणले जर्मन विश्वको तेस्रो अर्थतन्त्र र युरोपियनको एउटा प्रभावशाली शक्तिको रुपमा स्थापित भएको छ । तर नेपाल र जर्मनको व्यापारको हेर्दा धेरै ठुलो सहभागिता छैन । तीन वर्षको यहाँ पेश गरेकी छु । चार अर्ब चानचुनको निर्यात छ भने ६/७ अर्बको आयात छ ।’’

देशको नाम शुद्ध भन्न नसके पनि जोशीले कूटनीतिक माध्यमबाट दुइदेशबीचको आर्थिक सम्बन्ध विस्तार गर्न आफूले प्रयास गर्ने दाबी गरेकी छन् ।

प्रस्तावित राजदूत जोशीले भौगोलिक अवस्थितिका कारण जर्मनी विश्वको तेस्रो अर्थतन्त्र र युरोपेली युनियनको एक प्रभावशाली शक्ति भए पनि नेपाल र जर्मनीबीचको व्यापार ठूलो परिमाणमा नरहेको उल्लेख गर्दै कूटनीतिक माध्यमबाट दुइदेशबीचको आर्थिक सम्बन्ध विस्तार गर्न आफूले प्रयास गर्ने बताएकी हुन् ।

जर्मनीमा निर्यात बढाउनका लागि नयाँ माध्यम खोल्नु पर्ने र यसमा सुरुदेखि नै ध्यान दिने योजना रहेको उनको दाबी छ ।

उनले पर्यटन क्षेत्रलाई बढावा दिन र विविधीकरण गर्न वेलनेस पर्यटन, ग्रिन पर्यटन र साहसिक पर्यटन जस्ता विषयमा ध्यान दिनुपर्ने धारणा राखिन् । यसका लागि जर्मनीको टुर अपरेटर र नेपालको पर्यटन बोर्डबीच सहकार्य गरेर रणनीति बनाउनुपर्नेमा उनले जोड छ ।

जोशीले जर्मनीका सञ्चारकर्मी, इन्फ्लुएन्सर, ब्लगर तथा सगरमाथा चढेका व्यक्तिलाई बोलाएर डिजिटल प्रचारप्रसार गरेर पर्यटक नेपाल ल्याउन सकिने योजनासमेत सुनाएकी छन् ।