काठमाडौँ । नेकपाका नेता पूर्वप्रधानमन्त्री माधवकुमार नेपालले पत्रकार किशोर श्रेष्ठलाई पक्राउ गरिएकोमा आपत्ति जनाएका छन्। सामाजिक सञ्जाल फेसबुकमार्फत उनले श्रेष्ठको गिरफ्तारी र खानतलासीको नाममा उनको घरमा प्रहरीको गतिविधि आपत्तिजनक भएको बताएका हुन् ।

उनले कानुनी राज र प्रेस स्वतन्त्रताको सम्मान हुन नसके मुलुक झन ठूलो समस्यामा फस्ने नेतालको भनाइ छ ।

‘पत्रकार किशोर श्रेष्ठको गिरफ्तारी र खानतलासीको नाममा घरमा गरिएको प्रहरी गतिविधि आपत्तिजनक छ । कानूनी राज र प्रेस स्वतन्त्रताको सम्मान हुन नसके मुलुक झन् ठूलो समस्यामा फस्नेछ,’ नेपालले भनेका छन्।

पत्रकार श्रेष्ठलाई प्रहरीले बुधबार राति उनकै निवास ललतिपुरबाट पक्राउ गरेको हो। आज उनीविरुद्ध ३ दिनको म्याद थपको अनुमतिसमेत अदालतले दिइसकेको छ। त्यस्तै उनकी श्रीमतीले रिहाइको माग गर्दै सर्वाेच्च अदालतमा बन्दीप्रत्यक्षीकरणको निवेदनसमेत दायर गरेकी छन्।

उक्त निवेदनको पेसी शुक्रबारलाई तोकिएको छ। श्रेष्ठलाई भने गोपनीयता भंग गरिएको आरोपमा जिल्ला प्रहरी परिसर काठमाडौँको हिरासतमा राखिएको छ।