काठमाडौं- कलाकार दीपाश्री निरौलालाई ब्रेन ट्युमर भएको छ। उनका साथीसमेत रहेका कलाकार दीपकराज गिरीले उनलाई यो साता ब्रेन ट्युमर भएकव खुलाए ।

चलचित्र सुटिङको बिचमा दीपालाई ब्रेन ट्युमर भएको पत्ता लागेको उनले खुलाएका छन् । उनको माइतीघरस्थित अन्नपूर्ण न्यूरो अस्पतालमा शल्यक्रिया गरिएको छ।

‘दीपाजीलाई ब्रेन ट्युमर भएको पत्ता लागेपछि हामी अन्यौलमा पर्‍यौँ, तुरून्त शल्यक्रिया गर्नु पर्ने भयो । धेरै ठाउँबाट भारत जाने सल्लाह पाइयो’, उनले भनेका छन्, ‘तर अन्त्यमा नेपालकै अनुभवी डाक्टर वसन्त पन्तद्वारा शल्यक्रिया गर्ने निर्णय भयो ।’

गिरीले दीपाको ब्रेन ट्युमरको सफल शल्यक्रिया भइसकेको बताएका छन् । ‘शल्यक्रिया सफलतापूर्वक सम्पन्न भयो, हाल उहाँ आईसीयुबाट जनरल वार्डमा आएर स्वास्थ्यलाभ गर्दै हुनुहुन्छ’, उनले भनेका छन्, ‘आशिर्वाद दिने दर्शक तथा शुभचिन्तक, उपचारमा संगलग्न सम्पूर्ण स्वास्थ्यकर्मीलाई धन्यवाद !’