काठमाडौं- भारत सरकारले ऊर्जाको बढ्दो मागलाई सम्बोधन गर्न अरुणाचल प्रदेशमा ब्रह्मपुत्र नदीमा दुईवटा ठुला जलविद्युत् आयोजना निर्माणका लागि ४ अर्ब डलरभन्दा बढीको लगानी स्वीकृत गरेको छ। यस निर्णयअनुसार १७२० मेगावाट क्षमताको कमला आयोजना र १२०० मेगावाटको कलाई-दोस्रो आयोजना निर्माण गरिनेछ।

२६०.७ अर्ब भारतीय रुपैयाँ लागतको कमला आयोजना एनएचपीसी लिमिटेड र स्थानीय सरकारको संयुक्त उपक्रम हो भने १४१.०६ अर्ब रुपैयाँको कलाई आयोजना टीएचडीसी इन्डिया लिमिटेडले निर्माण गर्नेछ। यी दुवै आयोजना आगामी ६ देखि ८ वर्षभित्र सम्पन्न गर्ने लक्ष्य राखिएको छ।

यस लगानीले भारतको स्वच्छ ऊर्जा लक्ष्यमा ठुलो सहयोग पुर्‍याउने विश्वास गरिएको छ। भारतले सन् २०३० सम्ममा ५०० गिगावाट गैर-जीवाश्म इन्धनबाट ऊर्जा उत्पादन गर्ने र सन् २०७० सम्ममा कार्बन उत्सर्जन शून्यमा झार्ने लक्ष्य राखेको छ।