इस्लामावाद- इरान र अमेरिकालाई एकै टेबलमा राखेर वार्ता गराउन सफल भएपछि पाकिस्तानको विश्वभर चर्चा हुन थालेको छ।

पाकिस्तानभित्रै पनि नेताहरूले आफ्नो भूमि विश्वासिलो मध्यस्थकर्ताका रुपमा उभिएको दाबी गरेका छन्।

पञ्जाब प्रदेशकी वरिष्ठ मन्त्री मरियम औरङ्गजेबले इस्लामाबादमा भएको वार्तापछि पाकिस्तान विश्व मञ्चमा ‘विश्वसनीय शान्ति मध्यस्थ’का रूपमा स्थापित भएको दाबी गरेकी छन्।

सामाजिक सञ्जालमार्फत् उनले प्रधानमन्त्री शहबाज शरीफ, सेना प्रमुख असिम मुनीर र उपप्रधान तथा विदेशमन्त्री इशाक डारको भूमिकाको प्रशंसा गरेकी छन्।

उनले भनिन्, ‘इस्लामाबाद वार्ता इतिहासमा अंकित हुने ऐतिहासिक क्षण हो।’ यसका साथै, उक्त वार्ताले पाकिस्तानको आतिथ्यता, व्यावसायिकता र अन्तर्राष्ट्रियस्तरमा यसको प्रभाव बढाएको पनि उनले उल्लेख गरिन्।

इरानी संसद् अध्यक्षद्वारा प्रशंसा

इरानको संसद्का अध्यक्ष मोहम्मद बाघेर गालिबाफले पनि अमेरिकासँगको वार्ता सहज बनाउन सहयोग गरेकोमा पाकिस्तानप्रति आभार व्यक्त गरेका छन्।

उनले सामाजिक सञ्जालमा लेख्दै भने, ‘हाम्रा मित्रवत् र भ्रातृ राष्ट्र पाकिस्तानले वार्ता सहज बनाउन गरेको प्रयासप्रति म आभारी छु र पाकिस्तानका जनताप्रति सम्मान व्यक्त गर्दछु।’

अमेरिकाले जित्न सकेन इरानको विश्वास

उता उनै गालिबाफले वार्ताबारे प्रतिक्रिया दिँदै अमेरिकाले इरानको विश्वास जित्न असफल भएको बताएका छन्।

उनले वार्ताअघि नै इरानतर्फबाट सद्भाव र इच्छाशक्ति देखाइए पनि विगतका दुई युद्धको अनुभवका कारण विश्वासको कमी रहेको बताए।

उनले थपे, ‘इरानी टोलीले सकारात्मक पहलहरू अघि सारे पनि अन्ततः अमेरिकी पक्ष इरानी प्रतिनिधिमण्डलको विश्वास जित्न सकेन।’