मोरङ– विराट गोल्डकप फुटबल प्रतियोगिताअन्तर्गत शनिबार भएको उद्घाटन खेलमा झापा–११ विजयी भएको छ ।

विराट गोल्डकप फुटबल ट्रष्टद्वारा विराटनगरको शहीद रङ्शालाको फ्लड लाइटमा (रात्रिकालीन) नकआउट आधारमा भएको पहिलो खेलमा झापाले नेपाल आर्मीलाई २–१ गोलले पराजित गरेको हो ।

झापाका फागुराम थारूले खेलको १०औँ र ४४औँ मिनेटमा गोल गरेका थिए भने आर्मीका तर्फबाट खेलको २३औँ मिनेटमा नवीन लामाले एक गोल फर्काएका थिए ।

शनिबारको खेलमा उत्कृष्ट बनेका झापाका फागुराम थारूले नगद ११ हजार पुरस्कार प्राप्त गरेका छन् । प्रतियोगिता आगामी वैशाख ५ गतेसम्म सञ्चालन हुनेछ । प्रतियोगितामा नेपाल र भारतका गरी आठ समूहले सहभागिता जनाएका छन् ।

‘फुटबलको पर्व, विराटनगरको गर्व : विराट गोल्डकप’ नाराका साथ सञ्चालन भइरहेको प्रतियोगितामा नेपाल पुलिस क्लब, त्रिभुवन आर्मी फुटबल क्लब, मच्छिन्द्र फुटबल क्लब, नेपाल एपीएफ फुटबल क्लब, चर्च ब्वाइज युनाइटेड फुटबल क्लब, सम्राट स्पोर्टिङ क्लब (विराटनगर), झापा–११ फुटबल क्लब र भारत झारखण्डको विर्षामुण्डा फुटबल एकेडेमी सहभागी छन् ।

प्रतियोगिताको विजेता टालीले ११ लाख, उपविजेताले पाँच लाख रुपैयाँ पुरस्कार प्राप्त गर्नेछन् । उत्कृष्ट प्रशिक्षक, उत्कष्ट गोलरक्षक, सर्वाधिक गोलकर्ता खेलाडीलाई जनही १५ हजार दिइनेछ । सर्वोकृष्ट खेलाडीलाई ५१ हजार र दैनिक हुने खेलको उत्कृष्ट खेलाडीलाई नगद ११ हजार रुपैयाँ पुरस्कार प्रदान गरिनेछ ।

आजको खेल सशस्त्र प्रहरीको एपीएफ क्लब र चर्च ब्वाइज युनाइटेडबीच हुने आयोजकले जनाएको छ ।