काठमाडौं– इरानका नवनियुक्त सर्वोच्च नेता आयातोल्लाह मोज्ताबा खामेनीले होर्मुजको जलडमरुमध्य बन्द रहिरहने घोषणा गरेका छन् । सर्वोच्च नेताका रुपमा नियुक्त भएपछि आफ्नो पहिलो सन्देश जारी गर्दै आयातोल्लाह मोज्ताबा खामेनीले इरानका दुश्मनलाई दबाब दिनका लागि होर्मुज जलडमरुमध्य बन्द रहिरहने घोषणा गरेका हुन् ।

आफ्नो सन्देशमा उनले अमेरिकालाई पश्चिम एशिया क्षेत्रमा रहेका आफ्ना सैन्य अखडा तत्काल बन्द गर्न समेत चेतावनी दिएका छन् । नत्र इरानले ती अखडामा आक्रमण गर्ने उनको भनाइ छ । उनले इरानले आफ्ना छिमेकीसँग सम्बन्ध सुधार गर्नुपर्नेमा पनि जोड दिएका छन् ।

उनले आफ्ना सबै छिमेकी मुलुकसँग इरानले मित्रता चाहेपनि ती मुलुकमा रहेका अमेरिकी सैन्य अखडामा आक्रमणलाई निरन्तता दिने उल्लेख गरेका छन् । राष्ट्रिय एकतालाई मजबुत बनाउन आग्रह गर्दै सर्वोच्च नेता खामेनीले आफ्नो देशका लागि ज्यान दिने शहीदको रगतको बदला लिइने दृढता व्यक्त गरेका छन् ।

उनले सन्देशमा आफ्नो देशको सेनालाई धन्यवाद समेत दिएका छन् । उनले दबाब र आक्रमणका बेला इरानलाई जोगाएर सेनाले उत्कृष्ट कार्य गरेको बताएका छन् ।

सन्देशमा उनले इराक र यमनमा रहेका लडाकु समूहहरु पनि यस युद्धमा सहभागी हुने घोषणा गरे । उनले पछिल्लो युद्धका क्रममा क्षति भएकाहरुलाई मुआब्जा दिइनुपर्ने माग पनि अघि सारेका छन् ।