तेहरान- इरानले ड्रोनमार्फत इजरायलका दुईवटा एयरबेस र गोप्य एजेन्सीको मुख्यालयमा हमला गरेको दाबी गरेको छ।

इरानको सरकारी सञ्चारमाध्यमका अनुसार हमला पाल्माछिम एयरबेस र ओभ्डा एयरबेसमा हमला गरिएको हो। यीमध्ये एउटा एयरबेस भूमध्यसागर किनारमा रहेको याभेन सहरनजिक अवस्थित छ।

रिपोर्टका अनुसार शिन बेट (इजरायलको आन्तरिक गुप्तचर एजेन्सी) को मुख्यालयलाई पनि ड्रोन हमलामा निशाना बनाइएको छ। यद्यपि, यस हमलाबाट कति क्षति भयो भन्ने विषयमा हालसम्म स्पष्ट जानकारी सार्वजनिक भएको छैन।

पछिल्लो २४ घण्टामा १७९ जना घाइते

इजरायलको स्वास्थ्य मन्त्रालयका अनुसार इरानी हमलका क्रममा पछिल्लो २४ घण्टामा १७९ जना घाइते भएका छन्।

मन्त्रालयका अनुसार युद्ध सुरु भएयता हालसम्म कुल २ हजार ७४५ जना घाइते भइसकेका छन्।