काठमाडौं – नेपाली कांग्रेसको विशेष महाधिवेशन अन्तर्गत मंगलबार पार्टीको नीति पारित गर्दै नेतृत्व चयनका प्रक्रिया सुरु हुने नेताहरुले जनाएका छन् ।

विशेष महाधिवेशन प्रचार समितिले सोमबार पत्रकार सम्मेलन गर्दै विशेष महाधिवेशन अन्तर्गत मंगलबार पार्टीको नयाँ नीति पारित हुने र नेतृत्व चयनको प्रक्रिया अघि बढ्ने जानकारी दिएको हो ।

मंगलबार बिहान बिभिन्न प्रतिवेदनमाथिको समूहगत निष्कर्ष प्रस्तुत हुने प्रचार समितिका संयोजक सुवास पोखरेलले जानकारी दिए ।

समूहगत निष्कर्षपछि बन्दसत्रले पार्टीको नीति उपर निर्णय लिने र त्यसपछि नेतृत्व परिवर्तनको प्रक्रिया अघि बढ्ने उनले बताए । उनले विशेष महाधिवेशनको स्वामित्व लिन पार्टी नेतृत्व आए छुट्टै अवस्था सिर्जना हुन सक्ने र नेतृत्व नआए निर्वाचनमा जाने स्पष्ट पारे ।

पोखरेलले अहिलेसम्म ६३ प्रतिशतभन्दा बढी प्रतिनिधिहरुले हस्ताक्षर गरेको भन्दै ७० प्रतिशत पुराएर देखाउने दावी गरे ।