दोलखा– जिल्लाको मेलुङ गाउँपालिका वडा नम्बर-१ वडा अध्यक्ष तथा सचिव र कार्यालय सहयोगीविरुद्ध अख्तियारले भ्रष्टाचार मुद्दा दायर गरेको छ । 

अख्तियारले मेलुङ गाउँपालिका–१ का वडा अध्यक्ष ईश्वर कोइराला,सोही स्थानका तत्कालीन वडा सचिव विनय उप्रेती र कार्यालय सहयोगी दलबहादुर थापाविरुद्ध सोमबार मुद्दा दायर गरेको हो ।

उनीहरूलाई मृत्यु भइसकेका व्यक्तिको किर्ते सहीछाप गरी सामाजिक सुरक्षा भत्ता बापतको रकम निकाली हिनामिना गरेको अख्तियारको ठहर छ ।

मेलुङ-१ पवटीका सामाजिक सुरक्षा भत्ता प्राप्त गर्ने १४ जना लाभग्राहीको नामबाट मृत्युपछि पनि किर्ते गरी कूल १ लाख ७२ हजार सामाजिक सुरक्षा भत्ता दुरुपयोग गरेको अभियोग छ ।

उनीहरूले आर्थिक वर्ष २०७३/७४ देखि २०७५/७६ सम्म कार्यालय सहयोगी थापाले एक लाख, वडा सचिव थापाले ६४ हजार र वडा अध्यक्ष कोइरालाले ८ हजार भत्ता दुरुपयोग गरेको अख्तियारले ठहर गरेको छ । 

अख्तियारका प्रवक्ता सुरेश न्यौपानेका अनुसार अनुसन्धानको क्रममा वडा अध्यक्ष र दुवै कर्मचारीले आफ्नो औँठा छापा लगाएर भत्ता दुरुपयोग गरेको देखिएको छ ।

पवटीका १४ जना लाभग्राहीको मृत्यु भइसके पनि अभिलेखमा लगत कट्टा नगरी भत्ता दुरुपयोग गरेको अनुसन्धानबाट खुलेको छ ।

उनीहरू तीनै जनालाई गैर कानुनी तरिकाले सरकारी कागजात सच्याउने, केरमेट गर्ने, थपघट गर्ने र सार्वजनिक सम्पत्तिको हिनामिना समेत गरी भ्रष्टाचार निवारण ऐन २०५९ को दफा ११ र १७ बमोजिमको कसुर गरेको पुष्टि भएको भन्दै सजायको माग दाबी गरिएको छ । -सुवाश बस्नेत /दोलखा