काठमाडौं– नेपाली कांग्रेसका महामन्त्री प्रदीप पौडेलले विगतका तिक्तता बिर्सेर पार्टीलाई भावनात्मक रूपमा समेत एकताबद्ध बनाउने संकल्प रहेको बताएका छन् ।

कांग्रेसको १५औँ महाधिवेशनमा व्यक्त भएको मतले पार्टीका सबै नेता तथा कार्यकर्तालाई एकताबद्ध भएर अघि बढ्न स्पष्ट सन्देश दिएको उनको भनाइ छ ।

पौडेलले आन्तरिक प्रतिस्पर्धालाई लोकतन्त्रको सुन्दर अभ्यासका रूपमा लिनुपर्ने उल्लेख गर्दै महाधिवेशनपछि विगतका तिक्तता बिर्सेर एकताबद्ध कांग्रेस निर्माणमा लाग्नुपर्ने बताएका हुन् ।

‘विगतका तिक्तता बिर्सेर भावनात्मक रूपमा समेत एकताबद्ध कांग्रेस निर्माण गर्नुपर्ने छ । भावनात्मक रूपमै एक ढिक्का भएको बलियो कांग्रेस निर्माण गर्न हामी सबै सङ्कल्पबद्ध हुनुपर्दछ,’ उनले भने ।

कांग्रेससामु थुप्रै चुनौती रहेको उल्लेख गर्दै महामन्त्री पौडेलले ती चुनौतीको सामना गर्न पार्टीभित्र एकता आवश्यक रहेको धारणा राखेका छन् ।