काठमाडौं – विद्युत् नियमन आयोगले विद्युत् प्रसारण तथा वितरण प्रणालीमा खुला पहुँच कार्यान्वयनलाई थप व्यवस्थित बनाउन दुई नयाँ निर्देशिकाको मस्यौदा सार्वजनिक गरेको छ।

आयोगले ‘मिटर जडान तथा सञ्चालनसम्बन्धी निर्देशिका, २०८३’ र ‘डेभिएसन सेटलमेन्ट मेकानिजम तथा सम्बन्धित विषयसम्बन्धी निर्देशिका, २०८३’ राय, सुझाव तथा टिप्पणीका लागि सार्वजनिक गरेको हो।

प्रस्तावित व्यवस्थाले खुला पहुँचमा जोडिने उत्पादक तथा उपभोक्ताको विद्युत् उत्पादन–खपतको यथार्थ मापन र तथ्यांक व्यवस्थापनलाई प्राथमिकता दिएको छ। यस्तै, स्वीकृत विद्युत् आयात–निर्यात तालिकाबाट हुने विचलनअनुसार प्रतियुनिट ४ देखि १६ रुपैयाँसम्म जरिवाना तथा ५ देखि २० रुपैयाँसम्म प्रोत्साहनको व्यवस्था प्रस्ताव गरिएको छ।

आयोगले यसअघि गुनासो समाधान तथा ब्यालेन्सिङ–सेटलमेन्टसम्बन्धी निर्देशिकाको मस्यौदा सार्वजनिक गरिसकेको छ भने प्रसारण शुल्क र ग्रिड कनेक्टिभिटीलगायत थप निर्देशिका ल्याउने तयारी गरेको छ।