काठमाडौँ – एसीसी प्रिमियर कप एकदिवसीय क्रिकेटको फाइनलमा नेपालका ओपनर आशिफ शेखले अर्थशतक बनाएका छन्। अर्का ओपनर अर्जुन कुमालसँग ९७ रनको साझेदारी गरेका उनले ७३ बलमा ५० रन बनाउँदै अर्धशतक पूरा गरेका हुन्।

२१ ओभरको अन्तिम बलमा नेपालका अर्जुन कुमाल आशिफसँग तालमेल नमिल्दा रनआउट भए । अर्जुनले ६३ बलमा ६ चौका प्रहार गर्दै ४३ रन बनाए । अर्जुन आउट भएपछि तेस्रोक्रममा ब्याटिङ गर्न इशान पाण्डे क्रिजमा छन्। टस जितेर संयुक्त अरब इमिरेट्स (युएई)विरुद्ध सुरुमा ब्याटिङ गरेको नेपालका लागि ओपनरले महत्त्वपूर्ण साझेदारी गरेका हुन्।

मलेसियाको क्वालालम्पुरस्थित बायुमास ओभल मैदानमा कप्तान सन्दीप लामिछानेले टस जितेर ब्याटिङ रोजेपछि ओपनिङ आकर्षक बनेको हो ।

२७ ओभरको समाप्तिमा नेपालले दुई विकेट गुमाएर १२५ रन बनाएको छ । नेपालका लागि इशान पाण्डे २० बलमा १३ रन बनाएर आउट भएका हुन्। इशान आउट भएपछि रोहित पौडेल ब्याटिङमा आएका छन्। आशिफ ७८ बलमा ५८ रन बनाएर खेलिरहेका छन्।