सुर्खेत- सर्खेतबाट सल्यानतर्फ जाँदै गरेको जिप बुधबार दिउँसो भेरी नदीमा खस्दा चालकसहित दुईजना बेपत्ता भएका छन्।

लु १ ज ३०२२ नम्बरको जिप बालुवासङ्ग्रहीबाट सल्लिवजारतर्फ जाँदै गर्दा लहरेबगर नजिकै अनियन्त्रित भई भेरी नदीमा खसेको हो।

दुर्घटनालगत्तै जिप नदीमा खसेपछि गाडीसहित चालक र अन्य एक जना बेपत्ता भएको बताइएको छ। जिपमा सवार अन्य दुई जना भने पौडी खेलेर सकुशल बाहिर निस्कन सफल भएका छन्।

उक्त जिप नियमित रूपमा सल्लिवजार, खैरागार, सागिने र खार्वन रुटमा सञ्चालन हुँदै आएको थियो। चालक काम विशेषले बालुवासङ्ग्रही पुगेपछि पुनः सल्लिवजारतर्फ फर्कँदै गर्दा दुर्घटना भएको बताइएको छ।

बेपत्ता चालक र अर्का यात्रुको खोजी भइरहेको छ। घटनाको थप विवरण संकलन गर्ने कामसमेत भइरहेको जनाइएको छ।

तस्बिर : इन्द्रबहादुर बुढाथोकी