काठमाडौं- राष्ट्रिय स्वतन्त्र पार्टीका सांसद विपिन आचार्यले वरिष्ठ नेता वालेन्द्र शाह नेतृत्वको सरकारप्रति असन्तुष्टि पोखेका छन् ।

बिहीबार बसेको प्रतिनिधि सभाको बैठकको शून्य समयमा बोल्ने क्रममा उनले सरकारको कार्यशैलीलप्रति असन्तुष्टि पोखेका हुन् ।

उनलले संसद्को शून्य समयमा बोलेका कुराहरू सरकारसम्म कार्यान्वयनमै लगिने कुरामा आशंका व्यक्त गरेका छन् ।

‘शून्य समयमा हामीले बोलेका कुराहरू सुनिन्छन्, टिपिन्छन् र कार्यान्वयनको प्रक्रियामा लगिन्छन् भने यसलाई शून्य समय होइन पूर्ण समय भनौँ’, उनले भने, ‘तर यदि जनताका पीडा सांसदका प्रश्न र देशका मुद्दाहरू जति बोले पनि शून्यमा शून्यसरी बिलाएर जाने हो भने यसको नाम शून्य समय होइन, ब्ल्याक होल समय राखौँ ।’

उनले ब्ल्याक होलमा प्रकाश पनि हराएझैँ संसद्मा नागरिकको आवाज, जनप्रतिनिधिको जवाफदेहिता र सरकारको जिम्मेवारी हराउन नहुने पनि बताएका छन् ।

‘शून्य समय केबल बोल्ने औपचारिकता होइन, यो जनताको पीडा संसद्मा प्रवेश गर्ने सं‌वैधानिक ढोका हो तर ढोका खुलेपछि बाटो पनि हुनुपर्छ । त्यसैले मेरो स्पष्ट प्रस्ताव छ, शून्य समयमा उठेका विषयहरू अभिलेखमा मात्रै सीमित नगरियोस्’, उनले भने, ‘ती विषयहरू तत्काल सम्बन्धित मन्त्रालयमा पठाइयोस्, निश्चित समयभित्र कार्यान्वयनको प्रगति सांसदलाई जानकारी गराइयोस्।’

रास्वपामा सभापति रवि लामिछानेनिकट उनले सांसद बोलेपछि सरकारले सुन्नुपर्ने बताए । ‘सांसद बोल्ने, सरकार नसुन्ने, जनता कराउने व्यवस्था नसुन्ने परम्परा अन्त्य हुनुपर्छ’, उनले भने, ‘यो समय शून्य होइन जनताको आवाजको पूर्ण समय बन्नुपर्छ ।’