काठमाडौं- अमेरिका, इजरायल र इरानबीचको युद्धका कारण उत्पन्न तेल संकट र आपूर्ति अवरोधका बीच रुसले भारतलाई ठुलो आश्वासन दिएको छ।

रुसले आफ्ना ऊर्जा कम्पनीहरू भारतलाई तेल र तरल प्राकृतिक ग्यासको आपूर्ति निरन्तर बढाउन सक्षम रहेको बताएको छ। साथै, रुसले भारतको मलको आवश्यकतालाई पनि निरन्तर सम्बोधन गरिरहने प्रतिबद्धता जनाएको छ।

रुसी उपप्रधानमन्त्री डेनिस मान्तुरोभले दुई दिने भ्रमणका क्रममा प्रधानमन्त्री नरेन्द्र मोदीसँग भेटवार्ता गरेका छन् । सो अवसरमा उनीहरूबीच मल आपूर्तिका विषयमा विशेष छलफल भएको थियो।

मान्तुरोभले विदेश मन्त्री एस. जयशंकर, अर्थ मन्त्री निर्मला सीतारमण र राष्ट्रिय सुरक्षा सल्लाहकार अजित डोभालसँग पनि भेट गरी भारतमा ऊर्जा आपूर्तिको निरन्तरताबारे छलफल गरेका छन् । यस भ्रमणले संकटको समयमा दुई देशबीचको रणनीतिक र व्यापारिक सम्बन्धलाई थप मजबुत बनाउने देखिएको छ।