काठमाडौं – इन्डियन प्रिमियर लिग (आईपीएल) को जारी सिजनमा पञ्जाब किङ्सले तेस्रो जित हासिल गरेको छ। शनिबार भएको खेलमा पञ्जाबले सनराइजर्स हैदराबादलाई ६ विकेटले हराएको हो ।

यस जितपछि पञ्जाब ७ अङ्कसहित अङ्क तालिकाको दोस्रो स्थानमा उक्लिएको छ, भने राजस्थान रोयल्स ८ अङ्कसहित शीर्ष स्थानमा छ।

पञ्जाबले २२० रनको लक्ष्य १८ दशमलव ५ ओभरमा ४ विकेट गुमाउँदै पूरा गर्‍यो । कप्तान श्रेयस अय्यरले अविजित ६९ रनको उत्कृष्ट पारी खेले ।

न्यू चण्डीगढमा टस हारेर पहिला ब्याटिङ गरेको हैदराबादले २० ओभरमा ६ विकेट गुमाउँदै २१६ रन बनाएको थियो । ओपनर अभिषेक शर्माले २८ बलमा ७४ रन बनाए, जसमा ५ चौका र ८ छक्का समावेश थिए। उनले ट्राभिस हेडसँग मिलेर ५० बलमा १२० रनको शानदार सुरुआती साझेदारी गरे । पञ्जाबका बलर अर्शदीप सिंह र शशांक सिंहले समान २–२ विकेट लिए ।

लक्ष्य पछ्याउने क्रममा पञ्जाबका ओपनर प्रियंश आर्या र प्रभसिमरन सिंहले ९९ रनको बलियो साझेदारी गरे। आर्याले ५७ रन बनाए भने प्रभसिमरनले ५१ रन जोडे । त्यसपछि कप्तान अय्यरले टोलीलाई सहज जिततर्फ डोर्याए।

हैदराबादले भने सुरुआती ६ ओभरमा विकेट नगुमाई १०५ रन जोड्दै आक्रामक सुरुआत गरेको थियो, तर अन्त्यतिर पञ्जाबले उत्कृष्ट खेल देखाउँदै जित आफ्नो पक्षमा पार्न सफल भयो।