ललितपुर- ललितपुरस्थित हेरिटेज गार्डेनमा १३औँ संस्करणको ‘नेपाल ट्याटु कन्भेन्सन’ जारी छ। शुक्रबारदेखि सुरु भएको कन्भेन्सन आइतबारसम्म सञ्चालन हुने आयोजकले जनाएको छ।

सन् २०१० देखि वार्षिक रूपमा आयोजना हुँदै आएको यो कार्यक्रम कोभिड–१९ का कारण दुई वर्ष रोकिएको थियो। यस वर्षको संस्करणमा २५० भन्दा बढी नेपाली तथा विदेशी ट्याटु आर्टिस्टहरूको सहभागिता रहेको छ।

कन्भेन्सनका निर्देशक विजय श्रेष्ठका अनुसार सहभागीमध्ये करिब ४० प्रतिशत स्वदेशी र ६० प्रतिशत विदेशी आर्टिस्ट छन्।

उनले कन्भेन्सनको मुख्य उद्देश्य ट्याटु कला सम्बन्धी ज्ञान र सीपको आदानप्रदान गर्नु रहेको बताए। साथै, यस्ता कार्यक्रमले नेपाली ट्याटु उद्योगलाई अन्तर्राष्ट्रिय स्तरमा चिनाउन सहयोग पुग्ने विश्वास व्यक्त गरिएको छ।