काठमाडौं – भारतमा आयोजना हुने चर्चित फ्रेन्चाइज क्रिकेट प्रतियोगिता इन्डियन प्रिमियर लिग (आइपीएल) को २०२६ संस्करण आगामी मार्च २८ देखि सुरु हुने भएको छ । प्रतियोगिताको उद्घाटन खेल बेङ्गलुरुमा हुनेछ भने फाइनल पनि त्यहीँ आयोजना गरिने तय गरिएको छ।

सार्वजनिक तालिका अनुसार उद्घाटन खेलमा बेङ्गलुरु रोयल च्यालेन्जर्स र हैदरावाद सनराइजर्स आमनेसामने हुनेछन्। यस सिजनमा १० टोली सहभागी हुने छन् ।

प्रतियोगितामा कुल ८४ खेल खेलाइनेछन् । प्रतियोगिताको फाइनल खेल मे ३१ मा हुनेछ। उद्घाटन खेलपछि मार्च २९ मा मुम्बई इन्डियन्स र कोलकाता नाइट राइडर्स बीच प्रतिस्पर्धा हुनेछ। त्यसपछि मार्च ३० मा चेन्नई सुपर किंग्स र राजस्थान रोयल्स आमनेसामने हुने तालिका छ।

यसपटक खेल तालिका दुई चरणमा सार्वजनिक गरिएको छ । सुरुवाती केही साताका खेलहरूको तालिका मात्र सार्वजनिक गरिएको हो । भारतका केही राज्यमा हुने निर्वाचनका कारण बाँकी खेलहरूको तालिका पछि सार्वजनिक गरिने जनाइएको छ।